पोखरा विश्वविद्यालयले आफ्नो २०औँ दीक्षान्त समारोह आगामी फागुन ८ गते (फेब्रुअरी २०, २०२५) मा पोखरा विश्वविद्यालयको प्राङ्गण, पोखरा–३०, खुदी, ढुंगेपाटन, कास्कीमा आयोजना गर्ने जनाएको छ । शिक्षाविद् जोर्ज जोनको प्रमुख आतिथ्यतामा हुन गइरहेको उक्त दीक्षान्त समारोहको अध्यक्षता प्रधानमन्त्री एवम् पोखरा विश्वविद्यालयका कुलपति के.पि. शर्मा ओलीले गर्ने कार्यक्रम रहेको छ । साथै, कार्यक्रममा शिक्षा, विज्ञान तथा प्रविधि मन्त्री एवम् विश्वविद्यालयका सह–कुलपति विद्या भट्टराई उपस्थिति रहनेछ ।

उक्त समारोहमा ७,८७२ विद्यार्थी दीक्षित हुनेछन् भने ३० जना विद्यार्थीलाई विशिष्ट पदक र ७ सय ४५ विद्यार्थीलाई डीन लिस्टको उपाधिबाट सम्मानित गरिने विश्वविद्यालयले विज्ञप्ति मार्फत जानकारी दिएको छ ।

पोखरा विश्वविद्यालयले आफ्नो सामाजिक उत्तरदायित्वअन्तर्गत वार्षिक रूपमा १५ सयभन्दा बढी विद्यार्थीलाई निःशुल्क छात्रवृत्ति प्रदान गर्दै आइरहेको र विश्वविद्यालयले शिक्षा, अनुसन्धान र समुदाय सेवाका क्षेत्रमा उल्लेखनीय योगदान दिँदै आएको जनाएको छ ।

हाल देशभर रहेका विश्वविद्यालयका ४ वटा आंगिक क्याम्पस, ३ वटा संयुक्त आंगिक क्याम्पस तथा ५८ वटा सम्बन्धन प्राप्त कलेजहरूमा ६८ वटा कार्यक्रम सञ्चालनमा रहेका छन्, जसमा हाल करिब ४० हजार विद्यार्थी अध्ययनरत छन् ।